-చెన్నప్ప నాయుడుపేటలో జనసేన అభ్యర్థిగా బరిలోకి దిగాలని గ్రామస్తుల ఆకాంక్ష
పెళ్లకూరు, సత్య వెలుగు న్యూస్:పెళ్లకూరు మండలం చెన్నప్ప నాయుడుపేట గ్రామపంచాయతీ సర్పంచ్‌ ఎన్నికల నేపథ్యంలో జనసేన పార్టీ సీనియర్‌ నాయకుడు పుట్టా భానుప్రకాష్‌ పేరు ప్రముఖంగా వినిపిస్తోంది. పార్టీకి సుదీర్ఘకాలంగా సేవలందిస్తున్న ఆయనను సర్పంచ్‌ అభ్యర్థిగా బరిలోకి దింపాలని గ్రామస్తులు, అభిమానులు కోరుకుంటున్నట్లు స్థానికంగా చర్చ సాగుతోంది.
ప్రజలతో మమేకమై.. సేవే లక్ష్యంగా!
గ్రామ ప్రజలతో కలివిడిగా ఉంటూ వారి కష్టసుఖాల్లో పాలుపంచుకునే పుట్టా భానుప్రకాష్‌కు స్థానికంగా మంచి గుర్తింపు ఉందని ఆయన మద్దతుదారులు చెబుతున్నారు. పార్టీ పట్ల నిబద్ధత, ప్రజలతో సత్సంబంధాలు ఆయనకు బలంగా నిలుస్తాయని వారు అభిప్రాయపడుతున్నారు.
అభివృద్ధిపై ప్రత్యేక దృష్టి!
చెన్నప్ప నాయుడుపేట గ్రామంలో సర్పంచ్‌గా అవకాశం లభిస్తే తాగునీటి సమస్య పరిష్కారం, రహదారుల అభివృద్ధి, డ్రైనేజీ వ్యవస్థ మెరుగుదలకు ప్రాధాన్యత ఇవ్వాలనే లక్ష్యంతో ముందుకు సాగుతారని ఆయన వర్గీయులు చెబుతున్నారు. ఎన్డీఏ కూటమి నాయకుల సహకారంతో గ్రామాన్ని అభివృద్ధి పథంలో నడిపించాలనే ఆకాంక్షను వ్యక్తం చేస్తున్నట్లు సమాచారం.
జనసేన టికెట్‌ దక్కుతుందా?
జనసేన పార్టీ అధ్యక్షుడు, రాష్ట్ర ఉప ముఖ్యమంత్రి పవన్‌ కల్యాణ్‌ ఆశయాలకు అనుగుణంగా, సూళ్లూరుపేట నియోజకవర్గ ఇన్‌చార్జి ఉయ్యాల ప్రవీణ్‌ మార్గదర్శకత్వంలో, పెళ్లకూరు మండల నాయకత్వం సూచనలతో ప్రజాసేవలో ముందుకు సాగాలని ఆయన అభిమానులు కోరుకుంటున్నారు. గ్రామపంచాయతీ రిజర్వేషన్‌ తమకు అనుకూలిస్తుందనే ఆశాభావాన్ని కూడా కొందరు మద్దతుదారులు వ్యక్తం చేస్తున్నారు.
అయితే, సర్పంచ్‌ అభ్యర్థుల ఎంపికపై పార్టీ నుంచి అధికారిక ప్రకటన వెలువడాల్సి ఉంది. పుట్టా భానుప్రకాష్‌కు జనసేన పార్టీ టికెట్‌ లభిస్తుందా? గ్రామస్తుల ఆకాంక్ష నెరవేరుతుందా? అన్నది స్థానిక రాజకీయ వర్గాల్లో ఆసక్తికర చర్చగా మారింది.