–సమయపాలన పాటించడం లేదంటూ గ్రామస్తుల ఆవేదన.. విధులపై ఉన్నతాధికారులు విచారణ జరపాలని డిమాండ్!
సత్య వెలుగు న్యూస్ | నాయుడుపేట: నాయుడుపేట మండలం పుదురు గ్రామ పంచాయతీ సచివాలయంలో సిబ్బంది సమయపాలన పాటించడం లేదంటూ పరిసర ప్రాంతాల ప్రజలు తీవ్ర అసంతృప్తి వ్యక్తం చేస్తున్నారు. వివిధ ప్రభుత్వ సేవలు, సమస్యల పరిష్కారం కోసం సచివాలయానికి వస్తున్న గ్రామస్తులకు సిబ్బంది అందుబాటులో లేకపోవడంతో నిరాశతో వెనుదిరగాల్సిన పరిస్థితి నెలకొందని స్థానికులు వాపోతున్నారు.
ప్రభుత్వం ప్రజలకు పాలనను చేరువ చేయాలనే ఉద్దేశంతో గ్రామ సచివాలయ వ్యవస్థను ఏర్పాటు చేసినప్పటికీ, క్షేత్రస్థాయిలో సిబ్బంది సమయపాలన పాటించకపోతే ప్రజలకు ఇబ్బందులు తప్పవని గ్రామస్తులు అభిప్రాయపడుతున్నారు. సచివాలయానికి వచ్చిన సమయంలో సంబంధిత సిబ్బంది అందుబాటులో లేకపోవడంతో తమ పనుల కోసం పలుమార్లు తిరగాల్సి వస్తోందని ఆవేదన వ్యక్తం చేస్తున్నారు.
అధికారులు స్పందించాలి.. విచారణ జరపాలి!
పుదురు పంచాయతీ సచివాలయంలో సిబ్బంది హాజరు, విధుల నిర్వహణ, సమయపాలనపై పంచాయతీ కార్యదర్శి, మండల పరిషత్ అభివృద్ధి అధికారి (ఎంపీడీవో) ప్రత్యేకంగా దృష్టి సారించి సమగ్ర విచారణ చేపట్టాలని గ్రామ ప్రజలు కోరుతున్నారు. విధుల్లో నిర్లక్ష్యం ఉన్నట్లు తేలితే నిబంధనల ప్రకారం తగిన చర్యలు తీసుకోవాలని విజ్ఞప్తి చేస్తున్నారు.
ఇదే పరిస్థితి నాయుడుపేట మండలంలోని ఇతర గ్రామ సచివాలయాల్లోనూ ఉందని పలువురు గ్రామస్తులు ఆందోళన వ్యక్తం చేస్తున్నారు. ఉన్నతాధికారులు మండలవ్యాప్తంగా సచివాలయాల పనితీరును పరిశీలించి, ప్రజలకు ప్రభుత్వ సేవలు సకాలంలో అందేలా చర్యలు తీసుకోవాలని కోరుతున్నారు.
ప్రజల ప్రశ్న ఒక్కటే.. ప్రజలకు సేవ చేయాల్సిన సచివాలయ సిబ్బంది విధులకు సమయానికి హాజరవుతున్నారా? ఈ సమస్యపై అధికారులు ఎప్పుడు స్పందిస్తారు?