-అర్ధరాత్రి నుంచి తెల్లవారుజామున మధ్య తీరం దాటే అవకాశం..
-గంటకు 120 కి.మీ. వేగంతో బలమైన గాలులు!
-నెల్లూరు నుంచి నర్సాపురం మధ్య తీరం దాటే అవకాశం..
-తీరప్రాంత ప్రజలకు వాతావరణ శాఖ హెచ్చరికలు
సత్యవెలుగు న్యూస్ | నవంబర్ 2: బంగాళాఖాతంలో ఏర్పడిన తీవ్ర తుఫాన్ ‘మురసు’ ఆంధ్రప్రదేశ్ దక్షిణ తీరంవైపు దూసుకొస్తోంది. తుఫాన్ ప్రభావంతో దక్షిణ కోస్తా జిల్లాల్లో భారీ వర్షాలు, బలమైన ఈదురుగాలులు వీచే అవకాశం ఉందని భారత వాతావరణ శాఖ (IMD) హెచ్చరించింది. తీరప్రాంత ప్రజలు అప్రమత్తంగా ఉండాలని అధికారులు సూచించారు.
నెల్లూరుకు 100 కిలోమీటర్ల దూరంలో తుఫాన్
నవంబర్ 2 రాత్రి 6.55 గంటలకు జారీ చేసిన వాతావరణ శాఖ బులెటిన్ ప్రకారం మురసు తుఫాన్ నెల్లూరుకు తూర్పున సుమారు 100 కిలోమీటర్లు, కావలికి ఆగ్నేయంగా 120 కిలోమీటర్లు, ఒంగోలుకు ఆగ్నేయంగా 160 కిలోమీటర్ల దూరంలో కేంద్రీకృతమై ఉంది. గత ఆరు గంటల్లో గంటకు 10 కిలోమీటర్ల వేగంతో వాయువ్య దిశగా కదులుతోంది.
అర్ధరాత్రి తీరం దాటే అవకాశం
ఈ తుఫాన్ నవంబర్ 2 అర్ధరాత్రి 11.30 గంటల నుంచి నవంబర్ 3 తెల్లవారుజామున 4 గంటల మధ్య నెల్లూరు–నర్సాపురం మధ్య, ఒంగోలుకు దక్షిణంగా దక్షిణ ఆంధ్రప్రదేశ్ తీరాన్ని దాటే అవకాశం ఉందని IMD అంచనా వేసింది.
గంటకు 120 కిలోమీటర్ల వేగంతో గాలులు
తుఫాన్ తీరం దాటే సమయంలో గంటకు 100 నుంచి 110 కిలోమీటర్ల వేగంతో గాలులు వీచే అవకాశం ఉంది. అప్పుడప్పుడు గాలుల వేగం గంటకు 120 కిలోమీటర్ల వరకు చేరవచ్చని వాతావరణ శాఖ హెచ్చరించింది.
బాపట్ల, కృష్ణా, ప్రకాశం జిల్లాలకు ముప్పు
తుఫాన్ ప్రభావంతో బాపట్ల, కృష్ణా, ప్రకాశం జిల్లాల్లో సముద్రపు అలల ఉద్ధృతి పెరిగి లోతట్టు తీరప్రాంతాల్లో నీరు చొచ్చుకువచ్చే ప్రమాదం ఉందని IMD హెచ్చరించింది. సాధారణ అలల మట్టం కంటే 1 నుంచి 1.5 మీటర్ల వరకు సముద్రపు నీటి మట్టం పెరిగే అవకాశం ఉందని తెలిపింది.
పలు జిల్లాలకు భారీ వర్ష సూచన
నెల్లూరు, ప్రకాశం, బాపట్ల, గుంటూరు, కృష్ణా, పల్నాడు, మార్కాపురం తదితర ప్రాంతాల్లో భారీ నుంచి అతి భారీ వర్షాలు కురిసే అవకాశం ఉంది. కొన్ని ప్రాంతాల్లో అత్యంత భారీ వర్షాలు కూడా కురిసే ప్రమాదం ఉందని అధికారులు హెచ్చరిస్తున్నారు.
ఓడరేవుల్లో ప్రమాద హెచ్చరికలు
నిజాంపట్నం, వాడరేవు ఓడరేవుల్లో గ్రేట్ డేంజర్ సిగ్నల్ నంబర్-10, మచిలీపట్నంలో నంబర్-9, కృష్ణపట్నంలో నంబర్-8 హెచ్చరికలు కొనసాగుతున్నాయి.
ప్రజలు తీసుకోవాల్సిన జాగ్రత్తలు
- అత్యవసరమైతే తప్ప ఇళ్ల నుంచి బయటకు రావద్దు.
- సముద్రంలోకి చేపల వేటకు వెళ్లవద్దు.
- లోతట్టు ప్రాంతాల ప్రజలు అధికారుల సూచనలు పాటించాలి.
- విద్యుత్ స్తంభాలు, తెగిపడిన విద్యుత్ తీగలకు దూరంగా ఉండాలి.
- చెట్లు, బలహీనమైన నిర్మాణాల వద్ద నిలబడవద్దు.
- అధికారుల నుంచి వచ్చే హెచ్చరికలను ఎప్పటికప్పుడు గమనించాలి.
ప్రజల ప్రాణరక్షణే ప్రథమ కర్తవ్యం. తుఫాన్ పరిస్థితులపై అప్రమత్తంగా ఉండి అధికారుల సూచనలు తప్పనిసరిగా పాటించాలని వాతావరణ శాఖ, విపత్తు నిర్వహణ అధికారులు సూచిస్తున్నారు.
