-ఓం శక్తి, దేశమ్మ, సామలమ్మ ఆలయాల్లో ప్రత్యేక పూజలకు ఏర్పాట్లు
పుత్తూరు, సత్య వెలుగు న్యూస్:
నగరి ప్రాంతంలోని పలు అమ్మవారి ఆలయాల్లో ఆదివారం నుంచి 11 రోజుల పాటు నవరాత్రి ఉత్సవాలు ఘనంగా నిర్వహించేందుకు ఆలయ నిర్వాహకులు ఏర్పాట్లు చేస్తున్నారు. భక్తులకు ప్రత్యేక దర్శనాలు, పూజలు నిర్వహించనున్నట్లు నిర్వాహకులు తెలిపారు.
ఓం శక్తి ఆలయంలో ప్రత్యేక ఉత్సవాలు
నగరిలోని ఓం శక్తి ఆలయంలో ప్రతి సంవత్సరం నవరాత్రుల సందర్భంగా 11 రోజుల పాటు ఉత్సవాలు నిర్వహించడం ఆనవాయితీగా వస్తోంది. ఈ ఏడాది కూడా అమ్మవారిని 11 రూపాల్లో అలంకరించి భక్తులకు దర్శనం కల్పించనున్నారు. ఆలయ నిర్వాహకుల్లో ఒకరైన జ్యోతి నాయుడు నగరి ఎంపీడీవో కార్యాలయ ప్రాంగణంలో స్థానిక ఎమ్మెల్యే గాలి భాను ప్రకాష్‌ను కలిసి ఉత్సవాలకు ఆహ్వానించారు.
దేశమ్మ ఆలయంలోనూ నవరాత్రి వేడుకలు
నగరిలోని శ్రీ దేశమ్మ దేవస్థానంలో కూడా ఆదివారం నుంచి 11 రోజుల పాటు నవరాత్రి ఉత్సవాలు నిర్వహించనున్నట్లు పాలకమండలి సభ్యుడు మదన్ కుమార్ మొదలియార్ తెలిపారు. ఉత్సవాల సందర్భంగా అమ్మవారికి ప్రత్యేక పూజలు నిర్వహించనున్నట్లు పేర్కొన్నారు.
సామలమ్మ ఆలయంలో భక్తులకు ఆహ్వానం
నగరి మున్సిపాలిటీ పరిధిలోని మోర్ కిందపల్లి గ్రామ శివారులో ఉన్న శ్రీ సామలమ్మ తల్లి ఆలయంలోనూ నవరాత్రి ఉత్సవాలను ఘనంగా నిర్వహించేందుకు ఏర్పాట్లు చేస్తున్నట్లు నిర్వాహకులు రాజీవ్ నగర్ మణి, టైలర్ సోము తెలిపారు.
ప్రకృతి సోయగాల మధ్య ఆహ్లాదకరమైన వాతావరణంలో ఈ ఆలయం కొలువై ఉందని, ప్రతి నెలా పౌర్ణమి సందర్భంగా ప్రత్యేక పూజలు నిర్వహిస్తామని వారు వివరించారు. గత పౌర్ణమి పూజలకు నగరి నియోజకవర్గ బలిజ సంఘం అధ్యక్షుడు ఎం.వి. బాబు హాజరయ్యారు. ఈ సందర్భంగా ఆయన ఆలయ పరిసరాల్లోని ప్రశాంతమైన వాతావరణాన్ని, ఆధ్యాత్మిక అనుభూతిని కొనియాడారు.
దాతలు సహకరించాలని విజ్ఞప్తి
నవరాత్రి ఉత్సవాలను వైభవంగా నిర్వహించేందుకు పలువురు దాతలను సంప్రదిస్తున్నామని నిర్వాహకులు తెలిపారు. భక్తులు, దాతలు ముందుకు వచ్చి విరాళాలు అందించి ఉత్సవాల నిర్వహణకు సహకరించాలని రాజీవ్ నగర్ మణి, టైలర్ సోము విజ్ఞప్తి చేశారు.
సత్య వెలుగు NEWS – మా కలం.. సమాజానికి వెలుగు.
