సత్య వెలుగు న్యూస్ , నాయుడుపేట, నవంబర్ 12:
-నూతన విద్యార్థులకుఆత్మీయ స్వాగతం..
-యూనిఫారాలు పంపిణీ చేసిన పారిశ్రామికవేత్త పెసల రాజగోపాల్
నాయుడుపేట స్థానిక ప్రభుత్వ డిగ్రీ కళాశాలలో ప్రథమ సంవత్సరంలో నూతనంగా చేరిన విద్యార్థులకు స్వాగతం పలుకుతూ గురువారం ఫ్రెషర్స్ డే వేడుకలను ఘనంగా నిర్వహించారు. కళాశాల ప్రిన్సిపాల్ డాక్టర్ ఎన్. లక్ష్మిప్రసన్న అధ్యక్షతన జరిగిన ఈ కార్యక్రమంలో విద్యార్థులు ఉత్సాహంగా పాల్గొన్నారు.
ఈ సందర్భంగా ప్రిన్సిపాల్ డాక్టర్ ఎన్. లక్ష్మిప్రసన్న మాట్లాడుతూ కళాశాలలో అందుబాటులో ఉన్న వివిధ కోర్సులు, విద్యార్థులకు కల్పిస్తున్న సదుపాయాలు, కళాశాల సాధించిన విజయాలను వివరించారు. విద్యార్థులు విద్యతో పాటు క్రమశిక్షణను అలవర్చుకొని ఉన్నత లక్ష్యాలను సాధించాలని సూచించారు.
కార్యక్రమానికి ముఖ్య అతిథిగా ప్రముఖ పారిశ్రామికవేత్త, వితరణశీలి, కళాశాల సీపీడీసీ కార్యదర్శి పెసల రాజగోపాల్ హాజరై నూతన విద్యార్థులకు శుభాకాంక్షలు తెలిపారు. ప్రతి విద్యార్థి కష్టపడి చదివి తల్లిదండ్రులకు, కళాశాలకు మంచి పేరు తీసుకురావాలని పిలుపునిచ్చారు. ఎప్పటిలాగే ఈ ఏడాది కూడా విద్యార్థులకు యూనిఫారాలను పంపిణీ చేసి తన ఉదారతను చాటుకున్నారు. అంతేకాకుండా కళాశాలకు అవసరమైన కంప్యూటర్లను తన వంతు సహకారంతో సమకూర్చేందుకు కృషి చేస్తానని హామీ ఇచ్చారు.
ఈ సందర్భంగా 2026–27 విద్యా సంవత్సరానికి సంబంధించిన కళాశాల స్టూడెంట్ హ్యాండ్‌బుక్‌ను ముఖ్య అతిథులు ఆవిష్కరించారు.
విశిష్ట అతిథులుగా పాల్గొన్న కళాశాల పూర్వ ప్రధానాచార్యులు డాక్టర్ బాలరాజు, డాక్టర్ మధుసూదన వర్మ నూతన విద్యార్థులకు శుభాకాంక్షలు తెలిపారు. నాణ్యమైన విద్య అందించడంలో ప్రభుత్వ డిగ్రీ కళాశాల ముందంజలో ఉందని, ఎన్‌ఏఏసీ గుర్తింపుతో పాటు ఎన్‌టీసీ, ఎన్‌ఎస్‌ఎస్ వంటి సేవా కార్యక్రమాల్లోనూ కళాశాల ప్రత్యేక గుర్తింపు పొందిందని పేర్కొన్నారు.
కళాశాల సీపీడీసీ సభ్యులు ఎం. రామచంద్రరెడ్డి, చంద్రశేఖర్, సుబ్రహ్మణ్యం మాట్లాడుతూ కళాశాల అభివృద్ధికి తమ వంతు సహకారం అందిస్తామని తెలిపారు.
ఈ కార్యక్రమంలో కళాశాల వైస్ ప్రిన్సిపాల్, ఐక్యూఏసీ కోఆర్డినేటర్, అధ్యాపకులు, అధ్యాపకేతర సిబ్బంది, విద్యార్థులు పెద్ద సంఖ్యలో పాల్గొన్నారు.
అనంతరం జూనియర్లు, సీనియర్లు కలిసి ప్రదర్శించిన సాంస్కృతిక కార్యక్రమాలు వేడుకలకు ప్రత్యేక ఆకర్షణగా నిలిచాయి. విద్యార్థుల నృత్యాలు, ఇతర కళా ప్రదర్శనలు సభికులను విశేషంగా అలరించాయి.
నూతన విద్యార్థులకు ఆత్మీయ స్వాగతం పలుకుతూ, విద్యా ప్రస్థానానికి స్ఫూర్తినిచ్చిన ఈ ఫ్రెషర్స్ డే వేడుకలు ఆనందోత్సాహాల మధ్య ముగిశాయి.
