– 17 కార్పొరేషన్ల మేయర్‌ స్థానాలకు వర్గాలవారీ కేటాయింపులు
– బీసీలకు ఐదు, ఎస్సీలకు రెండు మేయర్‌ స్థానాలు
– 106 మున్సిపాలిటీల్లో బీసీలకు 36 అధ్యక్ష పీఠాలు
– మహిళలకు ప్రాధాన్యం ఇస్తూ ప్రభుత్వం ఉత్తర్వులు
విజయవాడ, అక్టోబర్ 12 ,సత్య వెలుగు న్యూస్ : ఆంధ్రప్రదేశ్‌లో స్థానిక సంస్థల ఎన్నికలకు సంబంధించి మేయర్‌, మున్సిపల్ అధ్యక్ష స్థానాల రిజర్వేషన్లను రాష్ట్ర ప్రభుత్వం ఖరారు చేసింది. రాష్ట్రంలోని 17 మున్సిపల్ కార్పొరేషన్ల మేయర్‌ స్థానాలకు వర్గాలవారీగా కేటాయింపులు చేస్తూ పురపాలక శాఖ ముఖ్య కార్యదర్శి సురేశ్‌కుమార్‌ ఉత్తర్వులు జారీ చేశారు. బీసీలకు ఐదు, ఎస్సీలకు రెండు, ఎస్టీలకు ఒకటి, జనరల్‌ మహిళలకు ఐదు, అన్‌రిజర్వ్‌డ్‌ కేటగిరీకి నాలుగు స్థానాలను కేటాయించారు. మరోవైపు రాష్ట్రంలోని 106 మున్సిపాలిటీల అధ్యక్ష స్థానాలకు కూడా రిజర్వేషన్లు ఖరారు చేశారు. ఎన్నికల షెడ్యూల్‌, నోటిఫికేషన్‌ వెలువడనున్న నేపథ్యంలో ప్రభుత్వం ఈ నిర్ణయం తీసుకోవడం ప్రాధాన్యం సంతరించుకుంది.
మేయర్‌ స్థానాల కేటాయింపుల్లో మంగళగిరి–తాడేపల్లిని ఎస్టీ కేటగిరీకి కేటాయించారు. రాజమహేంద్రవరం, కర్నూలు మేయర్‌ స్థానాలను ఎస్సీలకు కేటాయించారు. మచిలీపట్నం, కాకినాడ స్థానాలు బీసీ మహిళలకు రిజర్వు కాగా, ఏలూరు, అనంతపురం, చిత్తూరు స్థానాలను బీసీ జనరల్‌ కేటగిరీకి కేటాయించారు. విజయనగరం, శ్రీకాకుళం, గుంటూరు, కడప, విశాఖపట్నం మేయర్‌ స్థానాలు జనరల్‌ మహిళలకు కేటాయించారు. తిరుపతి, విజయవాడ, ఒంగోలు, నెల్లూరు మేయర్‌ స్థానాలను అన్‌రిజర్వ్‌డ్‌ కేటగిరీలో ఉంచారు. ఈ కేటాయింపుల ఆధారంగా ఆయా నగరాల్లో మేయర్‌ పదవులకు పోటీ చేసే అభ్యర్థుల ఎంపికలో రాజకీయ పార్టీలకు స్పష్టత రానుంది.
రాష్ట్రంలోని 106 మున్సిపాలిటీల అధ్యక్ష స్థానాల్లో ఎస్టీలకు మూడు, ఎస్సీలకు 14, బీసీలకు 36, జనరల్‌ కేటగిరీకి 53 స్థానాలను కేటాయించారు. ఎస్టీలకు కేటాయించిన మూడు స్థానాల్లో ఒకటి ఎస్టీ మహిళకు దక్కింది. ఎస్సీలకు కేటాయించిన 14 స్థానాల్లో ఏడు ఎస్సీ మహిళలకు, మరో ఏడు ఎస్సీ జనరల్‌ కేటగిరీకి కేటాయించారు. బీసీలకు కేటాయించిన 36 స్థానాల్లో 18 బీసీ మహిళలకు, మరో 18 బీసీ జనరల్‌ కేటగిరీకి ఇచ్చారు. జనరల్‌ కేటగిరీలో 26 స్థానాలు ఉండగా, జనరల్‌ మహిళలకు 27 స్థానాలు కేటాయించారు. ఈ విధంగా మున్సిపల్ అధ్యక్ష స్థానాల్లో మహిళలకు కూడా గణనీయమైన ప్రాతినిధ్యం కల్పించారు.
జనరల్‌ కేటగిరీకి కేటాయించిన మున్సిపాలిటీల్లో తణుకు, తెనాలి, గురజాల, తాడేపల్లిగూడెంతోపాటు అమలాపురం, ఎమ్మిగనూరు, కావలి, ప్రొద్దుటూరు, నందిగామ, కందుకూరు, మండపేట, దాచేపల్లి, నగరి, చీమకుర్తి, రాయదుర్గం, గిద్దలూరు, వినుకొండ ఉన్నాయి. గొల్లప్రోలు, అద్దంకి, పెద్దాపురం, ధర్మవరం, బద్వేలు, దర్శి, మార్కాపురం, మైదుకూరు, నరసరావుపేట కూడా ఈ కేటగిరీలో ఉన్నాయి. జనరల్‌ మహిళలకు కనిగిరి, కమలాపురం, కొవ్వూరు, వెంకటగిరితోపాటు బుచ్చిరెడ్డిపాళెం, ఎలమంచిలి, కల్యాణదుర్గం, ఆత్మకూరు, నరసాపురం, పలాస, పెడన, పలమనేరు, జమ్మలమడుగు, ఆకివీడు, పొన్నూరు, భీమవరం, చిలకలూరిపేట, జగ్గయ్యపేట, ఆమదాలవలస, మాచర్ల తదితర మున్సిపాలిటీలను కేటాయించారు.
ఎస్టీ కేటగిరీలో కర్నూలు జిల్లా ఆత్మకూరు, ఆలూరు మున్సిపాలిటీలను కేటాయించగా, గూడూరును ఎస్టీ మహిళకు రిజర్వు చేశారు. ఉయ్యూరు, సామర్లకోట, పిఠాపురం, నూజివీడు, కుప్పం, పొదిలి, బాపట్ల మున్సిపాలిటీలను ఎస్సీలకు కేటాయించారు. చింతలపూడి, సూళ్లూరుపేట, కొండపల్లి, నిడదవోలు, ఏలేశ్వరం, గుత్తి, చీరాల ఎస్సీ మహిళలకు కేటాయించారు. పిడుగురాళ్ల, పుత్తూరు, బేతంచర్ల, రామచంద్రాపురం, సత్తెనపల్లి, శ్రీకాళహస్తి, మదనపల్లె, తాడిపత్రి తదితర మున్సిపాలిటీలను బీసీలకు కేటాయించగా, పాలకొండ, తుని, పాలకొల్లు, కదిరి, పుంగనూరు, రాజంపేట, గుడివాడ, రాజాం, గుంతకల్లు, నందికొట్కూరు, ఆళ్లగడ్డ, సాలూరు, ఇచ్ఛాపురం, నర్సీపట్నం తదితర ప్రాంతాలను బీసీ మహిళలకు కేటాయించారు. రిజర్వేషన్ల ఖరారుతో స్థానిక ఎన్నికలపై రాజకీయ పార్టీల దృష్టి మరింత పెరగనుంది. ఎన్నికల షెడ్యూల్‌, నోటిఫికేషన్‌ వెలువడిన తర్వాత అభ్యర్థుల ఎంపిక, ప్రచార కార్యక్రమాలు ఊపందుకునే అవకాశం ఉంది.
