– ముఖ్యమంత్రి చంద్రబాబును అభినందించిన కేంద్ర మంత్రి
– బుర్రిపాలెంలో ప్రకృతి వ్యవసాయ క్షేత్రం సందర్శన
– రైతు జానకీరామ్‌కు ప్రశంసలు
తెనాలి, అక్టోబర్ 4, : ఆంధ్రప్రదేశ్‌లో ప్రకృతి వ్యవసాయాన్ని విస్తృతంగా ప్రోత్సహిస్తూ రాష్ట్రాన్ని దేశంలోనే అగ్రస్థానంలో నిలిపిన ముఖ్యమంత్రి నారా చంద్రబాబు నాయుడిని కేంద్ర వ్యవసాయ శాఖ మంత్రి శివరాజ్ సింగ్ చౌహన్ అభినందించారు. ఇళ్ల శంకుస్థాపన కార్యక్రమం సందర్భంగా రాష్ట్రంలో పర్యటించిన కేంద్ర మంత్రి, ముఖ్యమంత్రితో కలిసి తెనాలి సమీపంలోని బుర్రిపాలెంలో రైతు జానకీరామ్‌కు చెందిన ప్రకృతి వ్యవసాయ క్షేత్రాన్ని సందర్శించారు.
ఈ సందర్భంగా ప్రకృతి సాగు విధానాలను పరిశీలించిన కేంద్ర మంత్రి, రసాయన ఎరువులు లేకుండా విజయవంతంగా సాగు చేస్తున్న రైతు జానకీరామ్‌ను అభినందించారు. రైతును భుజం తట్టి ప్రోత్సహించిన శివరాజ్ సింగ్ చౌహన్, ఇలాంటి రైతులే వ్యవసాయ రంగానికి ఆదర్శంగా నిలుస్తారని పేర్కొన్నారు.
ప్రకృతి వ్యవసాయాన్ని ప్రోత్సహించడంలో ముఖ్యమంత్రి చంద్రబాబు నాయుడు తీసుకుంటున్న చర్యలు దేశానికి మార్గదర్శకంగా ఉన్నాయని కేంద్ర మంత్రి కొనియాడారు. ప్రకృతి సాగు విస్తరణలో ఆంధ్రప్రదేశ్ దేశంలోనే మొదటి స్థానంలో నిలిచిందని, రైతుల సంక్షేమం కోసం రాష్ట్ర ప్రభుత్వం చేపడుతున్న కార్యక్రమాలు అభినందనీయమని అన్నారు. వ్యవసాయ రంగంలో సుస్థిర అభివృద్ధి సాధించాలంటే ప్రకృతి సాగుకు మరింత ప్రాధాన్యం ఇవ్వాల్సిన అవసరం ఉందని ఈ సందర్భంగా నాయకులు అభిప్రాయపడ్డారు. రైతుల ఖర్చులు తగ్గడంతో పాటు నాణ్యమైన ఆహార ఉత్పత్తులకు ప్రకృతి వ్యవసాయం దోహదపడుతుందని పేర్కొన్నారు.
అనంతరం బుర్రిపాలెంలో ఏర్పాటు చేసిన సూపర్ స్టార్ కృష్ణ విగ్రహానికి కేంద్ర మంత్రి శివరాజ్ సింగ్ చౌహన్, ముఖ్యమంత్రి చంద్రబాబు నాయుడు నివాళులర్పించారు. కృష్ణ తెలుగు సినీ రంగానికి అందించిన సేవలను స్మరించుకున్నారు. ఈ కార్యక్రమంలో ప్రజాప్రతినిధులు, అధికారులు, రైతులు, గ్రామస్థులు పాల్గొన్నారు. ప్రకృతి వ్యవసాయం ద్వారా రైతుల ఆదాయం పెంచడం, పర్యావరణ పరిరక్షణ సాధించడం లక్ష్యంగా ప్రభుత్వం ముందుకు సాగుతోందని నాయకులు పేర్కొన్నారు.
